dellaaniswara

dellaaniswara

28-12-2021

11:39

واحد من التيم بتاعي كتب في تقييمه للسنة انه متضايق انه ما اترقاش للsalary level الاعلى، اصلا هو مش محتاج يترقى وهو على ليفيل مناسب جدا وعنده مساحة كبيرة يكبر جواه. قعدت معاه وفهمته ده وفهمته ان توقعاته ده مش منطقية ومش ضرورية اصلا. لولا انه كتب ده ما كنتش عرفت ان ده توقعاته!

حاجة تانية مهمة في الشغل، الحاجات الصعيرة اللطيفة اللي بره الشغل مهمة. انك تصبح عالناس الصبح وانت داخل، وتسلم عليهم و انت ماشي مثلا. انك تتغدى معاهم مش لوحدك. لو مسافر شغل او فسحة ترجعلهم بحلويات من المكان مثلا. لو جايب شاي مميز مثلا تحطه في الcoffee corner للكل يستخدمه .. الخ 😉

لما كنت شغال في مصر كنت جايب ميرمية و حاططها في الركن بتاع الشاي علشان لو اي حد عايز منها، و اوقات كنت اجيب لنفسي نعناع طازة و احطه للكل برضه. رحت مرة دمياط رجعتلهم بمشبك و شكلمة. كذلك في الشغل في هولندا دلوقتي لما برجع من مصر بجيبلهم بسبوسة او حلويات.

الحاجات الصغيرة اللطيفة اللي بتعملها في الشغل ده بتحطك في دماغ الناس بشكل لطيف. فاولا يبقوا عارفينك و عارفين انك جزء اساسي من الشركة (حتى لو شغلك مش اهم شغل)، و كمان يبقى اسمك بالنسبة لهم معروف، ما تبقاش حد مجتهد جدا بس مجهول و ما حدش يعرف اسمك غير مديرك.

لما كنت شغال في مصر كان زمايلي خريجين AUC او من مستوى اجتماعي كويس شوية، فكانوا بيتغدوا من اماكن غالية شوية. انا مع ان فلوسي كانت اقل شوية، بس كنت بتغدى معاهم علشان التواصل و اني ابقى جزء من المجموعة. و ده فعلا فادني بعد كده و بقى لي اسم كويس في الشركة.

اللي مهم برضه انك تساعد في حاجات بره صميم شغلك. يعني مثلا تعرض انك تشارك في الانترفيوهات مثلا. او لو في تدريب صيفي تبقى بتساعد في التحضيرات ليه و في التدريب نفسه. او لو الشركة مثلا عاملة ايفينت في ملتقى توظيف تعرض انك تشارك. الحاجات ده مع انها بره صميم الشغل، بس بتزود من قيمتك.

الحاجة الاهم بقى انك لازم دايما تصيت لنفسك، و تتكلم عن شغلك و انجازاتك. ما حدش حيأخد باله انت بتعمل ايه و بتنجز ايه و ايه التحديات اللي بتعديها من غير ما انت تتكلم عن نفسك. الشاطر الساكت ما بيتقدرش و ما بيكبرش.

اتاكد ان مديرك عارف انت بتعمل ايه دايما، وانه فاهم صعوبة الشغل وحجم المجهود فيه. كمان لما تخلص شغل مهم وتعمل انجاز، صيت لنفسك في ايميل لطيف لكل الstakeholders. ومش عيب تنفش ريشك وتتمنظر قدام المديرين وتسلط الضوء على شغلك. مش بس مهم ان مديرك يبقى عارف عنك، مدير مديرك اهم كمان!

ليه مهم ان مدير مديرك يبقى عارف اسمك وشغلك واهميته؟ لأن مديرك لما ييجي يرقيك او يزود مرتبك او اي حاجة، بيتناقش في ده مع مديره و باقي المديرين. فلو مدير مديرك ما يعرفش عنك حاجة، مهمة مديرك حتبقى اصعب. اما لو مدير مديرك عارف شغلك، ممكن هو اللي يقول لمديرك انك محتاج ترقية او زيادة!

حاجة تانية مهمة فكرني بيها @muhammadhani89، مهم يبقى في بينك وبين مديرك مييتنج دوري. الافضل كل شهر او اقل، وعالاقل كل 3 شهور. اقعد مع مديرك اتأكد انه عارف شغلك وانه مبسوط باداءك. واساله بشكل واضح عن رأيه في شغلك واداءك. ولو عنده ملحوظات اتناقش معاه فيها وفي ازاي تحسن اداءك.


Follow us on Twitter

to be informed of the latest developments and updates!


You can easily use to @tivitikothread bot for create more readable thread!
Donate 💲

You can keep this app free of charge by supporting 😊

for server charges...