🇪🇬جاك يعود🇪🇬

🇪🇬جاك يعود🇪🇬

16-11-2022

21:30

اكتشاف علمى مهم جدا الشهراللى فات تم الإعلان عن الفائز بجايزة نوبل في الطب وعلم وظائف الإنسان لسنة 2022.. والفائز كان العالم السويدى العظيم (سفانتي بابو) اللي قدر يعمل إنجاز كان المجتمع العلمي كله فاكره مستحيل تمامًا!! الراجل ده قدر يكتشف نوع كامل من البشر غير معروف، يتبع

وكان مجهول تمامًا بالنسبة للعلم.. وكمان قدر يبني الخريطة الجينية الكاملة لإنسان نياندرثال القديم اللي عاش على الأرض من حوالي 400 ألف سنة! طبعا فيه ناس كتير مش فاهمة معنى الكلام ده ايه طيب نحاول نفهم

بص يا سيدي.. يمكن واحد من أكبر الأسئلة اللي البشر كانوا دايمًا بيسألوها لنفسهم عن الماضي القديم جدًا للجنس البشري؛ هي يا ترى أيه شكل الناس اللي كانوا موجودين وعايشين زمان؟! ولفترات طويلة جدًا في التاريخ، مكناش نعرف أي حاجة عن تاريخنا وأصلنا..

كل اللي نعرفه إننا بشر، وعايشين على كوكب أزرق جميل في بقعة هادية من الفضاء، إسمه كوكب الأرض.. بس مع التطور العلمي والتكنولوجي اللي حصل في العقود اللي فاتت، بدأ علم الآثار Archaeology وعلم الحفريات Paleontology يكتشف حاجات مذهلة فعلًا..

الحاجات دي هي عبارة عن بقايا متحجرة من أجسام قديمة ومن عصور سحيقة القدم حرفيًا، بتقول إن مش احنا بس اللي كنا ساكنين على الأرض بقالنا آلاف السنين.. لأ ده كان في أجناس تانية كتير عايشة على الأرض دي غيرنا!! بصوا.. أنا وانتم، والبشر عمومًا اللي عايشين على الكوكب حاليًا،

بننتمي لفصيلة معينة من البشر بيسموها (الهومو سابيان Homo Sapiens).. والفصيلة دي أغلب الدراسات البيولوجية بتقول إن تاريخها بدأ في قارة إفريقيا من حوالي أكتر من 300 ألف سنة تقريبًا.. بس الفصيلة دي مكانتش لوحدها..

فيه فصيلة تانية من البشر كانت عايشة على الأرض قبلنا بكتير، إسمها (النياندرثال Neanderthals).. ودول عاشوا في أوروبا وأجزاء من غرب أسيا قبل حوالي 400 ألف سنة كاملين.. وفضلوا عايشين لفترة طويلة جدًا في مجتمعات منغلقة على نفسهم، وميعرفوش أي حاجة عن الجنس البشري التاني الغريب

اللي كان عايش في إفريقيا ده، اللي هو المفروض إحنا.. والوضع ده استمر على ما هو عليه لفترة طويلة للغاية.. بس من حوالي 70 ألف سنة كده، حصل حدث غامض وغير معروف بشكل كامل.. الحدث ده خلى فصيلة (الهومو سابيان) تهاجر من قارة إفريقيا، وتروح على الشرق الأوسط اللي هو شبه الجزيرة العربية،

وبعدين تدخل على أوروبا وأسيا.. وفي الوقت ده، كان إنسان النياندرثال لسه عايش هناك.. ف حصل اختلاط ما بين الجنسين دول، وتزاوج ما بينهم.. والتزاوج ده نتج عنه بقايا جينيه في الحمض النووي بتاعنا أنا وانت وغيرنا كتير.. والبقايا دي لسه موجودة في الـ DNA بتاعنا لحد دلوقتي!!

وبعدين من حوالي 30 ألف سنة كده، حصلت حاجة تانية خلت جنس إنسان النياندرثال ده ينقرض.. ومتبقاش غيرنا احنا!!.. ولحد وقتنا هذا وبناءً على تاريخ طويل من الأبحاث والاكتشافات العلمية في الحفريات القديمة اللي بتعود للفترات دي، كنا عارفين ان ده صحيح، وعارفين إننا فينا صفات من الناس دول،

وأجزاء من الحمض النووي بتاعهم لسه موجود فينا، بس مش عارفين هي أيه لإننا منعرفش أصلًا الشفرة النووية بتاعة جنس النياندرثال دي أيه.. ومعندناش الخريطة الجينية بتاعتهم!! وده طبعًا طبيعي، عشان فيه زمن طويل جدًا عدى على بقاياها اللي اكتشفنا بعضها في العصر الحالي..

والزمن ده خلي أجزاء كبيرة من الـ DNA في البقايا دي تصبح صعب جدًا التعرف عليها ودراستها في أي شيء مفيد.. ده غير انها كمان بتبقى على مدار عشرات الآلاف من السنين اختلطت بعشرات الملايين من عينات الحمض النووي التانية الملوثة، سواء من البكتيريا أو الإنسان المعاصر..

فبالتالي كان من شبه المستحيل اننا نقدر نطلع من الحفريات دي DNA نقي وكامل للنياندرثال.. بس من هنا بقى جه العالم اللي بنتكلم عنه اللي هو (سفانتي بابو Svante Pääbo) ده، وقدر يحقق المستحيل حرفيًا، اللي محدش قبله كان يحلم حتى انه يعمله!!

الراجل ده من خلال دراسته لبقايا حفريات إنسان نيادرثال قديم كان عايش من حوالي 40 ألف سنة، وتحديدًا قطعة من العظام بتاعته، قدر يستخلص منها حاجة إسمها (الميتوكوندريا Mitochondria).. ودي أي دكتور أو باحث في علم الأحياء أو البيولوجي هنا هيبقى عارفها، وهي عبارة عن أجزاء صغيرة جدًا

من الخلايا الحية، مسئولة عن انتاج معظم الطاقة الكيميائية اللي بتشغل الخلية، وبيبقى جواها جزء من الشفرة الجينية أو الـ DNA خاص بيها، غير بتاع باقي الخلية.. ودايمًا بيكون جاي من طرف الأم أو Maternal.. وبسبب ان أجزاء (الميتوكوندريا) دي كانت موجودة بأعداد كبيرة جدًا

في الحفرية اللي كان بيشتغل عليها، قدر لأول مرة تقريبًا يستخلص منها شفرة حمض نووي جزئية من إنسان النياندرثال.. وبكده لأول مرة في التاريخ بقى عندنا الـ DNA بتاع جنس من أقربائنا القدام جدًا، نقدر نقارنه بالـ DNA بتاعنا..

ولما عملنا ده، اتضح إن النياندرثال كانت صفاته مختلفة عننا بشكل مميز.. بس (سفانتي بابو) مسكتش عند كده.. ده قرر إنه بعدها يبدأ في مهمة مستحيلة حرفيًا.. باستعمال طرق حديثة ومتطورة ومعقدة جدًا طبيًا ف مش هتكلم عنها هنا، بدأ إنه يبني الخريطة الجينية الكاملة لإنسان النياندرثال

على مدار سنين طويلة، خطوة بخطوة، وشفرة بشفرة، وإنجاز بإنجاز.. لحد ما في سنة 2010، نجح أخيرًا في تحقيق المستحيل، ونشر أول تسلسل جينوم كامل Genome Sequence لإنسان النياندرثال!! ومن خلال دراسة التسلسل ده، اتضح ان أقرب جد مشترك للهومو سابيان (اللي هما البشر الحاليين)،

والنياندرثال، كان عايش من حوالي 800 ألف سنة تقريبًا! ومش بس كده.. ده اتضح ان كل البشر اللي عايشين في أوروبا وأجزاء من غرب أسيا عندهم جواهم من 1-4% تقريبًا من الشفرة الجينية للنياندرثال.. يعني معنى كده ان حصل اختلاط وتزاوج بين الجنسين دول،

في وقت هجرة إنسان الهومو سابيان من إفريقيا ومقابلتهم للنياندرثال.. والأوروبيين والأسيويين بس هما اللي عندهم الـ 1-4% من الـ DNA بتاع النيادرثال ده!! ومش بس كده.. ده لسه فيه حاجة مذهلة أكتر اكتشفها..

الراجل ده اكتشف إن فيه نوع كامل متميز وفريد من نوعه من البشر، وغير أي نوع تاني من اللي احنا نعرفهم، كان عايش في أجزاء من شرق أسيا وتحديدًا في قلب سيبيريا وجبال الصين، من مئات الآلاف من السنين.. والإكتشاف ده حصل بسبب إن بعض الباحثين البيولوجيين لقوا حفرية قديمة لعضمة صباع

كانت موجودة في كهف في قلب أصقاع جنوب سيبيريا اسمه كهف (دينيسوفا Denisova).. وعظام الصباع دي كانت بتحتوي جواها على عينات من الـ DNA محفوظة وسليمة بشكل مذهل بسبب البرد والجليد طبعًا! ولما (بابو) درس الـ DNA ده هو وفريقه، اكتشفوا الشيء المذهل..

الـ DNA ده غير متطابق مع أي نوع تاني من الأجناس البشرية المعروفة لينا.. مش شبه الـهومو سابيان، ولا شبه النياندرثال!! وده كان معناه إنهم اكتشفوا نوع جديد وقديم جدًا من البشر، غير معروف لينا تمامًا! والنوع ده اتسمى (إنسان الدينيسوفا Denisova) على اسم الكهف اللي لقوه فيه!

ولما قارنوا الـ DNA بتاع إنسان الدينيسوفا، مع الهومو سابيان والنياندرثال، اكتشفوا ان الجنس ده كان عايش في شرق وجنوب شرق أسيا.. وانه هما كمان اختلطوا بالهومو سابيان اللي هاجروا من إفريقيا، وتزاوجوا معاهم.. وكنتيجة لده،

فشعوب المنطقة دي موجود في الـ DNA بتاعهم حوالي 6% من الصفات بتاعت الدينيسوفا!! وعارف انت المذهل أيه؟! المذهل ان الإكتشافات دي عرفتنا سر صفات كتير غريبة موجودة عند الأنواع المعينة دي من الناس في العالم!!

يعني مثلًا الناس اللي عايشين في شرق وجنوب شرق أسيا، وتحديدًا في أصقاع ومرتفعات سيبيريا، وجبال التبت، عندهم جين معين في الـ DNA بتاعهم، إسمه EPAS1.. والجين ده هو اللي بيخليهم يقدروا يستحملوا ظروف البرد والإرتفاعات العالية جدًا اللي بيعيشوا فيها، ويتعاملوا معاها عادي..

وعشان كده بتلاقي الناس دول بيقدروا يعيشوا فوق الجبال الجليدية دي، في أماكن فيها الهواء شحيح للغاية، والحرارة بتوصل أحيانًا لتحت الصفر! ومش بس كده.. ده فيه جين تاني موجود في بشر كتير جدًا في كل مكان في العالم، أصولهم من شرق أسيا أو أوروبا، والجين ده أصله من النياندرثال،

وموجود في الخريطة الجينية اللي تم بناءها ليهم.. والجين ده بيعمل أيه؟! بيأثر في الإستجابات المناعية اللي بتحصل جوه أجسامنا البشرية، في وجه الأنواع المختلفة من الأمراض!! طب أومال البشر الحاليين اللي هما الهومو سابيان دول تميزوا بأيه؟

حسب الدراسات والأبحاث، فجنس الهومو سابيان كان متميز بإنه قادر على عبور البحار والمحيطات واحتمال ظروفها القاسية، وعشان كده انتشروا في العالم كله..وكمان بإنه ذكي وقدر يكون مجتمعات وحضارات معقدة وأنواع وأشكال مختلفة وقديمة من الفن والرسومات وقدر يستعمل ويبني الأدوات الحجرية والخشبية

وبردو النياندرثال كانوا بيعرفوا يستعملوا الأدوات الحجرية، بس مقدروش يطوروا منها على مدار مئات الآلاف من السنين اللي عاشوها لحد ما انقرضوا.. على عكس الهوموسابيان.. الحقيقة إن الكشوفات اللي عملها وصنعها (سفانتي بابو) قدرت فعلًا تغير نظرتنا لأصولنا وللتاريخ البشري نفسه،

وتفتح قدامنا الطريق لإكتشافات مذهلة فعلًا، كلها بتتعلق بأكثر الأسئلة اللي دايمًا كنا بنسألها لنفسنا غموضًا.. شكل الأرض والناس كان عامل ازاي زمان؟! وعشان كده الراجل ده استحق جايزة نوبل بجدارة.. ويمكن يكون واحد من أهم الناس اللي خدوا الجايزة دي في التاريخ تقريبًا..

عشان الإنجازات بتاعته أدت لتأسيس فرع كامل من العلوم البيولوجية، إسمه علم الأحياء القديمة أو الـ Paleogenomics.. فهل حد في العالم العربي سمع عنه، ولا حد في إعلامنا الجميل أتكلم عنه وعن اكتشافاته المذهلة دي؟!.. لأ طبعًا

بس في النهاية، أنت دلوقتي بقيت عارفه أهو، وعارف هو اكتشف أيه بالضبط وليه استحق جايزة نوبل عن جدارة.. اتمنى يكون الموضوع بقى اسهل نوعا ما



Follow us on Twitter

to be informed of the latest developments and updates!


You can easily use to @tivitikothread bot for create more readable thread!
Donate 💲

You can keep this app free of charge by supporting 😊

for server charges...